سیلاب ماہ و سال کی کوشش فضول ہے​

سیلابِ ماہ و سال کی کوشش فضول ہے​

رخسارِِ کائنات پہ صدیوں کی دھول ہے​

دامن جو کھینچتا ہے دمِ رخصتِ چمن​

گُلچیں! مِری نظر میں وہ کانٹا بھی پھول ہے​

ہر چیز کی حدود مقرر ہیں دہر میں ​

اک دشتِ آرزو ہے کہ بے عرض و طول ہے​

اے پیکرِ جمال! مِرے دل سے بھی گزر​

کہتے ہیں کہکشاں تِرے قدموں کی دھول ہے​

تجھ سے نہ اٹھ سکے گا تمنا کا بارِِ غم​

یہ بار میں اٹھاؤں گا تُو کیوں ملول ہے​

ترکِ تعلقات،۔ بحالِ تعلقات​

وہ ہے تِرا اصول، یہ میرا اصول ہے​

دل کو ذرا سنبھال کے رکھو میاں ایاز​

تنخواہِ زندگی کا یہ قبض الوصول ہے​

​

ایاز صدیقی​