یوں مسافر سے وہ گلفام پتہ پوچھتا ہے

 یوں مسافر سے وہ گلفام پتہ پوچھتا ہے

جس طرح رات کا آرام پتہ پوچھتا ہے

آگہی ایسا فسوں ہے کہ ترے مجنوں سے

عشق میں چھلکا ہوا جام پتہ پوچھتا ہے

جسم اک ایسی حقیقت ہے مرے یار جسے

لا بدن مانگتا ہے، رام پتہ پوچھتا ہے

میں تجھے چھوڑ کے جی سکتا نہیں دیر تلک

یہ وہ حرکت ہے کہ انجام پتہ پوچھتا ہے

جو تری کھوج میں نکلا ہے بھٹکتا ہی رہے

کتنا اچھا ہے صبح و شام پتہ پوچھتا ہے

لوٹ آیا ہوں بصد شوق، مگر اندر سے

بند دروازہ🚪 مرا نام پتہ پوچھتا ہے

میں جہاں گرد ہوں منزل سے علاقہ ہی نہیں

تُو کہاں جائے گا؟ ہر گام پتہ پوچھتا ہے

ذوالقرنین حسنی