مِرے دفتر کے قصے میں صنم خانے بہت ہیں

 دفتر نامہ

مِرے دفتر کے قصے میں

دھواں ہے

پاپیادہ وحشتیں ہیں

ادھ کھلے جسموں کے پردے سے

نکلتی لڑکیاں ہیں

مرغزاروں میں

ہوا اور بارشوں کے روبرو

کچھ کھڑکیاں ہیں

پھول ہیں

روشن ستارہ ہے

سفر اندر سفر لکھی کہانی ہے

ہوا اور بادلوں کے بیچ

مرگِ ناگہانی ہے

کہیں لاکھوں کروڑوں دن

مِری سانسوں سے لپٹے ہیں

مِرے دفتر کے قصے میں

مِری بالشت بھر

امید کی چادر کا کونہ ہے

مِرے پَل بھر کا ہونا ہے

سفر کی بے سر و سامانیاں ہیں

اک سگِ خوں نوش کی دُم ہے

جو ہلتی ہے تو میں

حیرت سرائے عشق سے

باہر نکلتا ہوں

اسے وہم و گماں کی سرحدوں میں

اپنی آنکھوں پہ لگاتا ہوں

تو میری شام ڈھلتی ہے

مکاں اور لا مکانی میں

حقیقت گم ہے

افسانے بہت ہیں

مِرے دفتر کے قصے میں

صنم خانے بہت ہیں

فرخ یار