دھوپ کے ماروں کو جس نے پھیل کر سایا دیا
ظالموں نے اس شجر کو جان کر کٹوا دیا
مثلِ گل جن میں مہکتا تھا وہ موسم اب کہاں
اس بلا کی دھوپ نے سارا بدن جھلسا دیا
میں تہی دستوں کی صف میں ورنہ کیوں آتا نظر
خود مرے مفلوج ہاتھوں نے مجھے دھوکا دیا
اب کوئی الجھن نہیں تو جی الجھتا ہے بہت
مجھ کو اے شام و سحر کس موڑ پر ٹھیرا دیا
اور گہری ہو گئیں اس سے تو یہ تاریکیاں
راستے میں رکھ دیا کس نے یہ ننھا سا دیا
وسعتوں میں جس کی گم ہے میری ذات و کائنات
زندگی تُو نے مجھے اک زخم تو ایسا دیا
اپنی صورت دیکھنے کو خود ترستا ہوں شمیم
دینے والے نے مجھے بے خال و خط چہرا دیا
مبارک شمیم
No comments:
Post a Comment