دیکھتے ہی دیکھتے آنکھیں بدل جاتا ہے وقت

 چلتے چلتے دفعتاً اِک چال چل جاتا ہے وقت

دیکھتے ہی دیکھتے آنکھیں بدل جاتا ہے وقت

سچ ہی کہتے ہیں سدا وقت ایک سا رہتا نہیں

برف کی صورت بہرصورت پگھل جاتا ہے وقت

قُربتیں اور دوریاں سب وقت کا اعجاز ہیں

صورتِ مہمان آج آتا ہے کل جاتا ہے وقت

وقت کو پابند کرنا کب کسی کے بس میں ہے

خود ہی رک جاتا ہے تھم جاتا ہے ٹل جاتا ہے وقت

زندگی بھر وہ کفِ افسوس ملتا رہ گیا

جب کسی ناداں کے ہاتھوں سے نکل جاتا ہے وقت

گاہے گاہے وقت پر بھی وقت آتا ہے کڑا

کوئی دیتا ہے سنبھالا اور سنبھل جاتا ہے وقت

وقت ہی کا دوسرا رخ ہے مکافاتِ عمل

جب میاں تنویر دُوجا رخ بدل جاتا ہے وقت

تنویر قادری