جلدباز کو دُہائی
زندگی وینٹی لیٹر پہ رکھا ہوا اک دلاسا نہیں
زندگی خون ہے
جس کی رفتار سے جسم کے سلسلوں کا
تسلسل بندھا ہے
سو آہستہ چل
میری سانسوں کے دھاگے
تناؤ کی تندی کے عادی نہیں
اپنی رفتار سے عجلتوں کا تجسس ہٹا
زندگی تیری انگلی پکڑ کر نہیں بھاگ سکتی
مرے ہم نما
ہم ضرورت کے سائے میں ٹھہریں
پڑاؤ کے پھولوں سے دامن بھریں
اور پھر سے نئی روشنی کا تحمل
رویوں کی بجھتی ہوئی چمنیوں میں بھریں
اس طرف آ
مرے خانۂ خواب کی چلمنیں
دھیرے دھیرے ہٹا
میرے سینے کو رستہ بنا
تیرے پیروں کی تاثیر میں
لمس کا شہد ہے
میرے ہونٹوں کے چٹیل پہاڑوں میں چل
اور وادی کی بنیاد رکھ
تیرا چھوڑا ہوا وقت پورا نہیں آ رہا ہے مجھے
تھوڑا آہستہ چل
میری سرسبزگی کا تماشا نہ کر
مجھ پہ اپنی توجہ کا خرچہ بڑھا
میں سکونت کا سامان ہوں
مجھ کو چھو کر گزرنے سے پرہیز کر
منیر جعفری
No comments:
Post a Comment