طاق پر مسندِ چراغ لگاؤ
تازہ کرنوں کا ایک باغ لگاؤ
اس کے دربار سے نہیں لوٹی
میری آواز کا سراغ لگاؤ
یہ محبت نہیں ریاضی ہے
دیکھو لڑکی! ذرا دماغ لگاؤ
کینوس پر بکھیرو رنگِ ہوس
اپنے ہاتھوں سے گُل پہ زاغ لگاؤ
صاف شفاف ہے مرا کُرتا
سرخ ہونٹوں سے کوئی داغ لگاؤ
دل کے بستے میں تم کو رکھنا ہے
اک ذرا آنکھ سے چراغ لگاؤ
میرے آگے صراحی رکھ دینا
ساری میزوں پہ جب ایاغ لگاؤ
کر رہا ہوں نبھاہ کی کوشش
کوئی تخمینۂ فراغ لگاؤ
فائق ترابی
No comments:
Post a Comment