کر سکی جب نہ تم پر اثر شاعری

 کر سکی جب نہ تم پر اثر شاعری

میں نے بس چھوڑ دی بے اثر شاعری

میرے شعروں سے نظریں چراتے ہو کیوں

میں تو کرتی ہوں بس بے ضرر شاعری

دل کی حسرت کو آہوں کو کرتی بیاں

میری بے تابیوں کا ثمر شاعری

عہد آدھے، ادھورے سے کچھ خواب ہیں

کچھ جفا کچھ وفا کا سحر شاعری

کبھی لکھتے ہوئے کبھی پڑھتے ہوئے

دل دُکھائے میرا، کس قدر شاعری

غم کے اظہار کا ہے سلیقہ سخن

درد لکھنے کا اعلیٰ ہنر شاعری

میں چھپوں دل سے، دل میرا مجھ سے چھپے

مجھ کو مجھ سے کرے با خبر شاعری

راز اندر کے سب کو بتانے لگی

ہو گئی کس قدر، پُر خطر شاعری

مجھ سے لکھنے کی جب ہر وجہ چھِن گئی

کیسے کرتی رہوں عمر بھر شاعری

میں تھی تنہا، میں تنہا ہوں، تنہا سدا

میری رہبر، میری ہمسفر شاعری

کوئی ہمراز میرا نہ اس کے سوا

میری محرم میری چارہ گر شاعری

عنبرین خان