بعد مدت جو میں اے چرخِ کُہن یاد آیا
کیا ستم کوئی نیا مشفقِ من یاد آیا
شعر کہتا تھا کہ مضمونِ دہن یاد آیا
اک معمہ یہ دمِ فکرِ سخن یاد آیا
اہلِ دنیا کو کسی دن نہ ہوئی فکرِ عدم
کیا مسافر ہیں کہ جن کو نہ وطن یاد آیا
دیکھ کر ابرِ بہاری مِری نسبت بدلی
صحنِ گلشن میں دلِ توبہ شکن یاد آیا
رشتۂ جاں میں گِرہ پڑ گئی الجھن کے سبب
دل کو جب گیسوئے پُر پیچ و شکن یاد آیا
پا کے سرچشمۂ حیواں جو پھر آیا الٹا
کیا سکندر کو تِرا چاہِ ذقن یاد آیا
مٹ گئی دل کے نہ ہونے سے وہ داغوں کی بہار
اے نظر وقتِ خزاں ہم کو چمن یاد آیا
منشی نوبت رائے
(منشی نظر لکھنوی)
No comments:
Post a Comment