خود اپنے قتل کا الزام دھو رہا ہوں ابھی

 خود اپنے قتل کا الزام دھو رہا ہوں ابھی

میں اپنی لاش پہ سر رکھ کے رو رہا ہوں ابھی

اسی پہ فصل کھڑی ہو گی اک صداؤں کی

میں جس زمین میں خامشی بو رہا ہوں ابھی

سب اپنی اپنی فصیلیں ہٹا لیں رستے سے

میں اپنی راہ کی، دیوار ہو رہا ہوں ابھی

کہو کہ دشت ابھی، تھوڑا انتظار کرے

میں اپنے پاؤں ندی میں بھگو رہا ہوں ابھی

میں تجھ کو پھینک بھی سکتا تھا زندگی لیکن

کسی امید پہ، یہ بوجھ ڈھو رہا ہوں ابھی

بہت سی آنکھیں میری راہ دیکھتی ہوں گی

میں ایک خواب ہوں تعبیر ہو رہا ہوں ابھی

اطہر ضیا