گرد راہ میں بدل رہا ہوں میں

 گردِ راہ میں بدل رہا ہوں میں

پر تِرے ساتھ چل رہا ہوں میں

دُھند بادل دُھویں کی بات نہیں

وقتِ مغرب ہے، ڈھل رہا ہوں میں

تُو بہت دور ہے یا تیری طرف

اُلٹے قدموں سے چل رہا ہوں میں

میں ہوں مشکل میں اور یاد ہے نا

تیری مشکل کا حل رہا ہوں میں

تیرے رستوں پہ چند سال چلا

اور تا عمر شل رہا ہوں میں

جسم تو سرد پڑ گیا، لیکن

لوگ کہتے ہیں جل رہا ہوں میں

جو تمہیں آج کل میسر ہے

اس کا نعم البدل رہا ہوں میں

علی قائم نقوی