کمائی درد میں شہرت تو اس جہاں پہ کھلے

 کمائی درد میں شہرت تو اس جہاں پہ کھلے

کہاں کہاں کے فسانے مِرے بیاں پہ کھلے

زمیں کی گود سے جب تیرگی نے پایا جنم

تو ماہ و انجم و خورشید آسماں پہ کھلے

یہ سوچ کر میں حقیقت بیان کرتی گئی

جو آج بات چھپاؤں تو کل کہاں پہ کھلے

ہوئی جو بات خد و خال کے حوالے سے

تو پتھروں کی طرح آئینے جہاں پہ کھلے

کئی سوالوں کے اندر جواب رکھا گیا

کچھ اس طرح کے بھی مضمون امتحاں پہ کھلے

مفصل ایک کہانی کو جب بیان کیا

تو لفظ اپنے معانی میں داستاں پہ کھلے

کہاں رہی مِرے احساس میں توانائی

کہاں کہاں کے نہ غم میرے جسم وجاں پہ کھلے

یاسمین سحر