لفظ آواز میں گونجے تو سمجھ آئے کچھ

 لفظ آواز میں گونجے تو سمجھ آئے کچھ

جسم جذبات سے نکلے تو سمجھ آئے کچھ

گو کہ منزل پہ پہنچ پائے نہیں ہم لیکن

واپسی کے لیے رستے تو سمجھ آئے کچھ

تُو دراڑوں میں ہے یا ہیں یہ دراڑیں تجھ میں

آئینہ ٹوٹ کے بکھرے تو سمجھ آئے کچھ

لمس محسوس کے احساس سے نکلے تو کُھلے

بیل دیوار سے لپٹے تو سمجھ آئے کچھ

زخم بھر جائے تو احساسِ زیاں ہوتا ہے

اشک آنکھوں سے نہ ٹپکے تو سمجھ آئے کچھ

وہم ہر چیز کو ابہام بنا دیتا ہے

سایہ دیوار سے اُترے تو سمجھ آئے کچھ

کتنی آسانی ہے مشکل کو سمجھ لینے میں

کوئی اس بات کو سمجھے تو سمجھ آئے کچھ

اجمل فرید