تلخی کو اس کے دل سے مٹاتا رہا ہوں میں

 تلخی کو اُس کے دل سے مٹاتا رہا ہوں میں

پتھر سے آئینے کو بچاتا رہا ہوں میں

ہاں رقص کر سکی نہ کبھی زندگی مِری

پر ڈُگڈگی کمال بجاتا رہا ہوں میں

کرتا رہا ہوں سب کی محبت کا اعتبار

سب پر یقیں کا بوجھ بڑھاتا رہا ہوں میں

اک سیّدہ کو عشقِ مجازی سِکھا دیا

واعظ کو بھی شراب پلاتا رہا ہوں میں

کوئی جواب گہری خموشی نہ دے سکی

لیکن سوال پھر بھی اُٹھاتا رہا ہوں میں

وہ لوٹ ہی نہ آئے کہیں اگلی ٹرین سے

جس بے بسی سے ہاتھ ہلاتا رہا ہوں میں

اجمل فرید