ربط باہم جو بڑھاؤ تو کوئی بات بھی ہے
اب وفا تم بھی نبھاؤ تو کوئی بات بھی ہے
پیار کا دعویٰ سبھی کرتے ہیں چلتے پھرتے
پیار میں مر کے دکھاؤ تو کوئی بات بھی ہے
صرف دو دن میں ہو محبوب میرے قدموں میں
ایسا تعویذ دلاؤ تو کوئی بات بھی ہے
اک محل سے کہاں الفت کو جلا ملتی ہے
بستیاں دل کی بساؤ تو کوئی بات بھی ہے
بھول جاؤ جو مجھے تم یہ بڑی بات نہیں
تم مجھے یاد نہ آؤ تو کوئی بات بھی ہے
حاتم وقت ہو دنیا سے وفا کرتے ہو
مجھ کو اپنا بھی بناؤ تو کوئی بات بھی ہے
پہلے الفت کا تم اظہار کرو جی بھر کے
اور پھر مجھ کو ستاؤ تو کوئی بات بھی ہے
یاسمین یاس
No comments:
Post a Comment