اب اہل دل ہیں کہ نایاب ہوتے جاتے ہیں

 اب اہلِ دل ہیں کہ نایاب ہوتے جاتے ہیں 

غبارِ خاطرِ احباب ہوتے جاتے ہیں 

تمہارے آنے سے کچھ اضطراب کم ہوتا 

یہ کیا کہ اور بھی بےتاب ہوتے جاتے ہیں 

سکوں مآب سمجھتے تھے جن کناروں کو 

سمٹ کے حلقۂ گرداب ہوتے جاتے ہیں

ہمیں بھی رات کو دن کہنا آتا جاتا ہے

کہ ہم بھی حاملِ آداب ہوتے جاتے ہیں

ہمیں ملے نہ ملے زندگی، مگر نکہت

سنا ہے زیست کے اسباب ہوتے جاتے ہیں

نکہت بریلوی