خود حمایت میں خود خلاف میں ہوں

 کس عجب کنجِ انکشاف میں ہوں

خود حمایت میں خود خلاف میں ہوں

خیر میں ہر طرف ضرر دیکھوں

حلقۂ عقلِ موشگاف میں ہوں

ایک دنیا ہو بس مکمل سی

اس زمیں کے تو میں خلاف ہوں

عقل کی ہاں میں ہاں ملاتا ہوں

آج کل خود سے انحراف میں ہوں

چپ ہوں خود کو ہرا کے منطق سے

تب سے خودبیں ہوں اعتکاف میں ہوں

معنی سمجھا رہا ہے الفت کے

اس کے آغوشِ انکشاف میں ہوں

مثلِ اردو ہوں اس کی باتوں میں

اس کے لہجے کے شین قاف میں ہوں

سر خوشی سے ہوا میں اڑتا ہوں

ثقل کے حزبِ اختلاف میں ہوں

کیا یہ سایہ ہے اس کی زلفوں کا

یا کسی مخملی غلاف میں ہوں

عشق ہاتھوں سے پھسلا جاتا ہے

عقل کے دلدلی شگاف میں ہوں

سید کاشف