رگوں میں زہر ترے ہجر کا اتارا ہے

 رگوں میں زہر تِرے ہجر کا اتارا ہے

مگر یہ ہجر تِرے وصل کا اشارا ہے

بلائیں لینے لگا ہے اب آئینہ میری

تمہارے لمس نے ایسا مجھے سنوارا ہے

وہ بازگشت تھی گزرے ہوئے زمانے کی

مجھے تھا وہم کہ اس نے مجھے پکارا ہے

ابھی تو اور کئی امتحان آئیں گے

یہ ہجر عشق کا اولیں شمارا ہے

ہوا چلے تو یہ دیوار گر بھی سکتی ہے

ابھی جسے تِری تصویر کا سہارا ہے

کھٹک رہا ہے مسلسل جہان والوں کو

وہ ایک شخص ہمیں جان سے جو پیارا ہے

ڈبو چکا ہے سفینے کئی محبت کے

کنارا بھول گیا ہے کہ وہ کنارا ہے

فہیم بوجھ تھا شاید میں زیست پر کوئی

مجھے خراج میں دے کر جو اس نے مارا ہے

محمد فہیم