ہمارے ذہن میں کوئی نشاں نہ تھا پہلے

 ہمارے ذہن میں کوئی نشاں نہ تھا پہلے

تمہاری رہبری کا بھی گُماں نہ تھا پہلے

لڑی ہے حوصلوں کی جنگ ہم نے سورج سے

ہمارے سر پہ کوئی سائباں نہ تھا پہلے

تمام باغ میں دم گُھٹ رہا ہے پُھولوں کا

ہراس و خوف کا ایسا دُھواں نہ تھا پہلے

ہمارے کھیت میں اُگتی تھیں امن کی فصلیں

یہ کُشت و خون کا دریا رواں نہ تھا پہلے

شفق کو دیکھ کے چڑیاں اُداس ہیں ساری

لہو لہو تو کبھی آسماں نہ تھا پہلے

سُنا ہے اس نے فقیروں کی جھولیاں بھر دیں

امیرِ شہر تو یوں مہر باں نہ تھا پہلے

حریمِ ناز کے دیدار سے ہوا شاید

وگرنہ یوں مِرا دل شادماں نہ تھا پہلے

پرویز مانوس