پڑھ کر درود آنکھ کی پتلی کو نم کرو

 پڑھ کر درود آنکھ کی پُتلی کو نم کرو

وحدت سے چشمِ مست کو یوں محترم کرو

کُھل کے کرو جی کس نے کہا ہے کہ کم کرو

اِس میں سکوں ملے تو مِری جاں ستم کرو 

کمبخت کون کہتا ہے تم اِس کو ضم کرو

نکلے جگر کو چِیر کے ہُو ایسے غم کرو

مستی کی انتہا تو ذرا دیکھو حشر میں 

کروٹ بدل بدل کے کہا شور کم کرو

ہنس ہنس کے کہہ رہے ہو مجھے کوئی غم نہیں

نا آشنائے غم ہو، مِرے یار! غم کرو

وقتِ نزع بھی آرزو عاشق کی یہ رہی 

پڑھ پڑھ کے اسمِ یار کو تم مجھ پہ دم کرو

اِک بار تم سے ملنے کو ترسے تمام عمر 

کچھ تو خیالِ عاشقاں میرے صنم کرو

دمِ وصال بھی ہے وہ حیا کہ بول اٹھے 

گستاخ ہے یہ، اِس کا ابھی سر قلم کرو

یزداں کی رحمتیں بجا، پر آسرا ہو تم 

دوں واسطہ حسینؑ کا آقاﷺ کرم کرو

محروم کر گیا ہے جو اشکوں سے بھی تمہیں

پتھر جو اک ہے سینے میں اس کا بھی غم کرو

محرم میں بھی نہ رہ سکے ہو تم غزل سے باز

احسن میاں خدا کے لیے کچھ شرم کرو

احسن اقبال احمد