سب رقیبوں کو بتا کر چیختے ہیں

 سب رقیبوں کو بتا کر چیختے ہیں

اس لیے ہم سر اٹھا کر چیختے ہیں

چیخ میں چیخیں ملا کر چیختے ہیں

جب کبھی ہم مسکرا کر چیختے ہیں

وہ یقیناً ایک ہجرت کر چکے ہیں

جو پرندے چہچہا کر چیختے ہیں

زندگی بھی ناچتی ہے اور ہم بھی

ایک دوجے کو نچا کر چیختے ہیں

اہـلـیــانِ دل ہمیں گـر سن رہے ہیں

آئیں دل سے دل لگا کر چیـختے ہیں

ایک سگرٹ دیکھ کیسے چیختا ہے

جب کبھی ہم کش لگا کر چیختے ہیں

مر چکے ہم، آزمائے جا چکے ہیں

وہ ہمیں اب آزما کر چیختے ہیں

آئینہ بھی چیختا ہے اور ہم بھی

آئینے کو غم دکھا کر چیختے ہیں

دیکھتے ہیں کون زیادہ چیختا ہے

آئیے شرطیں لگا کر چیختے ہیں

خواب میں بھی بڑبڑاتے ہیں ابھی ہم

جاگتے ہی جھنجھلا کر چیختے ہیں

ہم زمانے کے لیے لکھتے تھے لیکن

اب دیواروں کو سُنا کر چیختے ہیں

رات بھر ہم چیخ کر ہنستے ہیں حیدر

اور دن بھر کھلکھلا کر چیختے ہیں

حیدر علی