بن باس ہوئے جوگ لیا یار کی خاطر
دکھ سہنے کو سکھ چین تجا یار کی خاطر
سہتا ہوں سبھی جور و جفا یار کی خاطر
ہر طرح ہوں راضی بہ رضا یار کی خاطر
دل دے دیا میں نے اگر ان کو تو عجب کیا
کرتے ہیں سبھی شاہ و گدا یار کی خاطر
وہ منزل دشوار ہو یا وادیٔ پر خار
طے کرتا ہوں میں آبلہ پا یار کی خاطر
فرماتے ہیں وہ شکوۂ بیداد و جفا پر
کرتے ہیں سبھی اہل وفا یار کی خاطر
ہر ایک سے دنیا میں کیا ترک تعلق
اپنوں سے بھی بیگانہ ہوا یار کی خاطر
مرنا بھی پئے دوست حیات ابدی ہے
ہر زہر فنا، آب بقاء یار کی خاطر
جینا پڑا مر مر کے محبت میں شہیر آہ
جو کچھ نہ ہوا تھا وہ ہوا یار کی خاطر
شہیر مچھلی شہری
No comments:
Post a Comment