عارفانہ کلام نعتیہ کلام
موزوں کلام میں جو ثنائے نبیؐ ہوئی
تو ابتداء سے طبع رواں منتہی ہوئی
ہر بیت میں جو وصفِ پیمبرؐ رقم کیے
کاشانۂ سخن میں بڑی روشنی ہوئی
ظلمت رہی نہ پرتوِ حُسنِ رسولؐ سے
بے کار اے فلک شبِ مہتاب بھی ہوئی
ساقی سلسبیل کے اوصاف جب پڑھے
محفل تمام مست مئے بے خودی ہوئی
دل کھول کر رسولؐ سے میں نے کیے سوال
ہرگز طلب میں عار نہ پیشِ سخی ہوئی
تاریک شب میں آپؐ نے رکھا جہاں قدم
مہتابِ نقشِ پاؐ سے وہاں روشنی ہوئی
ہے شاہِ دیںؐ سے کوثر و تسنیم کا کلام
یہ آبرو تمام ہے حضرؐت کی دی ہوئی
سالک ہے جو کہ جادۂ عشقِ رسولﷺ کا
جنت کی راہ اس کے لیے ہے کھلی ہوئی
آزاؔد اور فکر جگہ پائے گی کہاں
الفت ہے دل میں شاہِ زمنؐ کی بھری ہوئی
ابوالکلام آزاد
No comments:
Post a Comment