تجلی تم سے ممکن ہو تو کاشانہ میں رکھ دینا

 تجلی تم سے ممکن ہو تو کاشانہ میں رکھ دینا

چراغِ آرزو دل کے سِیہ خانہ میں رکھ دینا

مجھے یہ چشمۂ حیواں کے پانی سے زیادہ ہے

تم اپنے منہ کی جُوٹھی میرے پیمانہ میں رکھ دینا

کسی کی دلربا تصویر کہتی ہے اشاروں سے

صنم خانہ کی زینت ہوں صنم خانہ میں رکھ دینا

تِرے قربان او قاصد! مِری آنکھیں بھی لیتا جا

انہیں کے واسطے ہیں ان کے نذرانہ میں رکھ لینا

وہ کہتے ہیں؛ کوئی آسان ہے سودا محبت کا

یہاں پڑتا ہے پہلے جان بیعانہ میں رکھ دینا

اسی دربار کے ہم بھی دعا گو تھے کبھی ساقی

ہمارے نام کی بھی ایک پیمانہ میں رکھ دینا

بس اب تو رات دن یہ شغل یہ سودا ہے افسر کو

تِری تصویر لینا اور بُت خانہ میں رکھ دینا

افسر صدیقی