میخانۂ حاضر کا نظام اور طرح کا

مے خانۂ حاضِر کا نظام اور طرح کا

مے اور طرح کی ہے تو جام اور طرح کا 

اس دور کے ساقی کا ہے اپنے لیے کچھ اور

اوروں کے لیے بادہ و جام اور طرح کا

اوروں میں لُٹائے ہیں سبُو اور طرح کے

اور مجھ کو دیا اس نے ہے جام اور طرح کا

پُوچھو نہ مزاج اس بُتِ سیماب صِفت کا

صُبح اور طرح کا ہے تو شام اور طرح کا

صیّاد کا مقصد ہے وہی خونِ دل و جاں

دھوکے میں نہ ڈالے تمہیں دام اور طرح کا

دیکھے ہے زمانہ جسے حسرت کی نظر سے

اس شوخ کا اندازِ خِرام اور طرح کا

کیا کیا نہیں دُنیا میں تکلّم کی ادائیں

اس کا ہے مگر طرزِ کلام اور طرح کا 

اِس بزم میں کچھ اور ہے اُس بزم میں کچھ اور

ہرجائی کا ہر جا ہے پیام اور طرح کا 

دلدار! یہ معیار ہے اس عالمِ نَو کا

کام اور طرح کا ہے کلام اور طرح کا

دلدار احمد علوی