عارفانہ کلام نعتیہ کلام
زباں محو ثناء ہے گنبدِ خضرا کے سائے میں
مؤدب التجا ہے گنبد خضرا کے سائے میں
ہم اپنا دامنِ مقصود بھر لائے مرادوں سے
ہمیں سب کچھ ملا ہے گنبد خضرا کے سائے میں
کلام پاک دیتا ہے گواہی اس حقیقت کی
مقدر جاگتا ہے گنبد خضرا کے سائے میں
ملے گا حشر کے دن بھی وہ میزانِ محبت پر
وہ آنسو جو گِرا ہے گنبد خضرا کے سائے میں
اگر سینے میں ہوتا تو دھڑکنے کی صدا آتی
یہ دل کھویا ہوا ہے گنبد خضرا کے سائے میں
کبھی خود کو کبھی اُنؐ کے کرم کو دیکھتا ہوں میں
کہ مجھ سا بے نوا ہے گنبد خضرا کے سائے میں
سمجھتا ہے خموشی کی زباں اُنﷺ کا کرم خالد
خموشی بھی صدا ہے گنبد خضرا کے سائے میں
خالد محمود خالد
خالد محمود نقشبندی
No comments:
Post a Comment