راس آ گئی ہے ظلمت زنداں تو کیا کروں

 راس آ گئی ہے ظلمتِ زنداں تو کیا کروں

میرے جنوں کا ہے یہی درماں تو کیا کروں

سانسوں کا قرض کیسے چکاؤں اے زندگی

مجھ سے نہ اٹھ سکے تِرا احساں تو کیا کروں

میرے بدن پہ دھوپ کی یورش، مِرا نصیب

ہے شرمسار دامنِ جاناں تو کیا کروں

دنیا سے تیرا درد چھپا کر رکھوں مگر

دل کے لہو سے سرخ ہو مژگاں تو کیا کروں

رنگینئ حیات کو ٹھکراؤں کس طرح

آواز دے رہا ہے بیاباں تو کیا کروں

تیرے ستم کی آگ میں جلنا قبول ہے

دل ہے تِرے کرم سے گریزاں تو کیا کروں

تقدیر لے رہی ہے اسیری میں امتحاں

زاہد عروج پر ہے گلستاں تو کیا کروں

زاہد وارثی