اب تو ہجوم یاس کی کچھ انتہا نہیں

 اب تو ہجومِ یاس کی کچھ انتہا نہیں

یعنی مجھے اُمید کا بھی آسرا نہیں

کب ہم سے بے دلوں پہ نگاہِ جفا نہیں

ہم خوب جانتے ہیں کہ تُو بے وفا نہیں

اللہ رے بے نیازیٔ آسودگان خواب

اس قُرب پر کسی سے کوئی بولتا نہیں

آتی ہے ذرے ذرے سے آواز بازگشت

پھر بھی یہ کہہ رہا ہے ابھی کچھ کہا نہیں

وہ خود بھی دفن ہو گئی اہلِ وفا کے ساتھ

بے کار ڈھونڈھتا ہے جہاں میں وفا نہیں

صدقے تِرے کرم کے نہ دے زحمتِ سوال

کشکول ہے فقیر کا دستِ دعا نہیں

وہ دید ہائے شوق کہ دیکھیں تِرا جمال

کس کا بہشت کچھ بھی انہیں دیکھتا نہیں

کیوں اس کے چومتے ہی نہ معراج ہو نصیب

بیخود! خدا کا ہاتھ ہے دستِ دعا نہیں

بیخود موہانی