جنون عشق جو معیار سے گزارے مجھے

 جنونِ عشق جو معیار سے گزارے مجھے

مگر وہ پہلے کسی دار سے گزارے مجھے

کچھ اس لیے بھی وہ دروازے بند کرتا گیا

وہ چاہتا تھا کہ دیوار سے گزارے مجھے

اگر وہ چاہتا ہے مجھ کو خوشبوؤں جیسا

تو خود ہوا بنے، اشجار سے گزارے مجھے

فلک میں تارے بھروں، چاند میں دھنک گھولوں

مِرا شعور جو افکار سے گزارے مجھے

میں خود کو عرض و سماوات سے گزاروں گا

جو زندگی مِری رفتار سے گزارے مجھے

کسی طرح مِرے دشمن! تجھے سکون آئے

لے میرا دوست ہی تلوار سے گزارے مجھے

عزیز ہے اسے تشہیر اپنی بھی احسان

وگرنہ یوں نہ وہ اخبار سے گزارے مجھے

احسان گھمن