اپنی پلکوں پہ مِرے اشک پرونے والی
مجھ سے بھی پہلے مِرے درد پہ رونے والی
مجھ کو احساسِ یتیمی سے بچائے رکھا
پھول ہی پھول مِری راہوں میں بونے والی
میری ہر سانس ہے مقروضِ محبت تیری
بوڑھے ہاتھوں سے مِرے کپڑوں کو دھونے والی
صبر اور شکر تِری عمر کا حاصل ٹھہرے
قلزمِ فقر میں تن من کو ڈبونے والی
تجھ کو انعام ملے کیوں نہ کلیدِ جنت
حبِ درویشاں میں ہے پاس تو ہونے والی
مجھ کو جرموں کی تلافی کا بھی موقعہ نہ دیا
بے خیالی میں مِرے ہاتھ سے کھونے والی
روز روتی ہے مِری تلخ مزاجی تجھ کو
میٹھی باتوں سے مِرے دل کو بھگونے والی
کون راتوں کو مِرے واسطے اب جاگے گا
تختِ فردوس پہ آرام سے سونے والی
ماں کو کھویا ہے تو یہ راز کُھلا ہے دائم
ماں تو ماں ہوتی ہے چاہے ہو کھلونے والی
دائم بٹ
No comments:
Post a Comment