مصلحت گوش رہے عشق سے بیگانہ بنے

 مصلحت گوش رہے عشق سے بیگانہ بنے

نہیں ممکن یہ طریقِ دلِ دیوانہ بنے

ہے یہ بیداد کہ بے چاک گریباں بھی یہاں

ہدفِ سنگِ ملامت سرِ دیوانہ بنے

خامشی پر بھی ہماری یہ قیاس آرائی

بات جو منہ سے نہ نکلے وہی افسانہ بنے

دل کا یہ حوصلہ غم ہے بڑی بات مگر

ہو ستم گر کو ندامت کہیں ایسا نہ بنے

آرزو مند ہی سہی ایک زمانہ اکبر

وہ کسی اور کا کیا ہو گا جو اپنا نہ بنے

اکبر حیدرآبادی