دھوپ میں ساتھ مرے وہ بھی جلا کرتا تھا

 دھوپ میں ساتھ مِرے وہ بھی جلا کرتا تھا

وہ جو اک سایہ مرے ساتھ چلا کرتا تھا

اک دِیا تھا کہ جو جلتے ہی بجھا کرتا تھا

اور دُھواں سا مرے سینے سے اُٹھا کرتا تھا

درد بن کے مرے پہلو میں رہا کرتا تھا

جو مرے واسطے سجدے بھی کِیا کرتا تھا

اِک تِرا غم کہ مرے پاس نہیں رہتا تھا

خون بن کے مِری آنکھوں سے بہا کرتا تھا

مِری آنکھوں میں کوئی خواب سماتا کیسے

مِری آنکھوں میں تِرا ہجر رہا کرتا تھا

کھو گیا چھوڑ کے مجھ کو وہ خلاؤں میں کہیں

مجھ سے ملنے کی جو دن رات دعا کرتا تھا

کس لیے چھوڑ گئے ہیں مِرے اپنے مجھ کو

میں تو ہر حال میں یاروں سے وفا کرتا تھا

مُردنی سی مِری آنکھوں میں امڈ آئی ہے

میں تو ہر وار زمانے کا سہا کرتا تھا

وقت نے کاٹ دئیے پر تو گِرا منہ کے بل

مجھ کو دیکھو میں ہواؤں میں اُڑا کرتا تھا

آج یہ وقت ہے شاہد کہ میں خود ہوں مجبور

میں تو لوگوں کے بھی زخموں کو سِیا کرتا تھا

شاہد مرزا