ہمرہی تو مری دو گام نہیں کر سکتا

 ہمرہی تُو مِری دو گام نہیں کر سکتا

سو تِرے شہر میں آرام نہیں کر سکتا 

مجھ کو جھیلے گا مِرے جیسا ہی پامال بدن

کام یہ خاص کوئی عام نہیں کر سکتا

لوگ کرتے ہیں تہِ عشق میں جانے کیا کیا

تُو مِرے نام کوئی شام نہیں کر سکتا؟

ایک تو عشق کروں، دوسرا مزدوری بھی

ایک ہی وقت میں دو کام نہیں کر سکتا

نام لیتے ہیں تِرا لوگ، تو ہو جاتا ہوں 

مجھ کو ہر شخص تو اب رام نہیں کر سکتا

ان طلسماتی اشاروں کو نہیں مانوں گا

وہ ٹریفک کو اگر جام نہیں کر سکتا

میرا ہو جائے تو پھر ٹھیک ہے ورنہ انجم

عزتِ نفس کو نیلام نہیں کر سکتا

منیر انجم