دربان شاہ دین ہی دربان نعت ہے

 عارفانہ کلام حمد نعت منقبت

دربانِ شاہ دین ہی دربانِ نعت ہے

روح الامین یعنی نگہبانِ نعت ہے

صد لاکھ احتیاط کہ عنوانِ نعت ہے

وہ آئے اس طرف جسے ایقانِ نعت ہے

مدحت نگار کے لیے دونوں ہی ایک ہیں

باغِ عدن کے پاس خیابانِ نعت ہے

مصرعے سجے ہوئے ہیں کہ رنگوں کی لہر ہے

قوسِ قزح ہے یا کوئی گل دانِ نعت ہے

ہر شعبۂ حیات ہے سیرت سے متصل

"ہر شعبۂ حیات میں امکانِ نعت ہے "

جس پر نگاہ کی وہی مقبول بارگاہ

جس پر کرم ہوا وہی سلطانِ نعت ہے

ہو گی منادی حشر میں آئے وہ اس طرف

جس پاس اک بھی مصرعِ امکانِ نعت ہے

دشتِ غزل میں گھوم لیے ہو تو پھر سنو

اب اس سے آگے سارا گلستانِ نعت ہے

مدحت نگاری میں ہمیں اس پر بھِی فخر ہے

اردو زباں کا اپنا دبستانِ نعت ہے

واجد ڈھکا چھپا نہیں چشمِ خدائی سے

تیری سخن وری پہ جو احسانِ نعت ہے

واجد امیر