عارفانہ کلام حمد نعت منقبت
الٰہی اپنے کرم سے عنایتیں کر دے
مِرے نصیبِ سخن کی ذہانتیں کر دے
میں لفظ و معنی کے ابہام سے نکل جاؤں
سخن شناس فضا کی سماعتیں کر دے
انا کی سرکشی، بس میں مِرے نہیں آتی
مِری جبیں کے مقدر عبادتیں کر دے
ہزار ہاتھ ہوس کے مِری تلاش میں ہیں
پناہِ ذات مِری سب صداقتیں کر دے
ہوائیں مانگ رہی ہیں مہیب تاریکی
ہمارے نام چراغوں کی ساعتیں کر دے
طلسمِ دشتِ ابوالہول کے حصار میں ہوں
نشانِ راہ مجھے اپنی آیتیں کر دے
تِری ثنائے مقدس سے ابتداء کی ہے
مِری کتاب کی روشن عبارتیں کر دے
محسن جلگانوی
No comments:
Post a Comment