بالوں کی سیاہی میں سفیدی جو عیاں ہے
بس چونکیے یہ صبح کی آوازِ اذاں ہے
یوں لذتِ آآزارِ قفس رشتۂ جاں ہے
"اب دل پہ نشیمن کا تصور بھی گراں ہے"
ہر سُو نگراں ہوں متجسس ہیں نگاہیں
سائے تو بہت ہیں مگر انسان کہاں ہیں
اے ہستئ موہوم تری شعبدی کاری
اک خوابِ پریشاں ہے فقط وہم و گماں ہے
دل میں خلشِ درد، لبوں پر ہے تبسم
اس محفلِ اندوہ میں یہ رقصِ فغاں ہے
سن اے سفرِ زیست میں بے گانۂ منزل
ہر نقشِ لحد تیری ہی منزل کا نشاں ہے
ہم کو تو چمن بندئ گلشن سے سروکار
کیا اس سے غرض موسمِ گل ہے کہ خزاں ہے
ایس اے مہدی علیگ
No comments:
Post a Comment