کتنی حسیں ہے شام چلو شاعری کریں
چھوڑو یہ تام جھام چلو شاعری کریں
اس شغل میں نہ وقت نہ موسم کی شرط ہے
ہو صبح یا کہ شام چلو شاعری کریں
مرحوم شاعروں کا جو مل جائے کچھ کلام
سرقے کا لے کے جام چلو شاعری کریں
اپنا بھی کچھ کلام ہو اوروں کے مال میں
دو چار دس گرام چلو شاعری کریں
سسرال میں بھی دال کا گلنا محال ہے
سالے ہیں بے لگام چلو شاعری کریں
خالی ہے جیب گھر میں بھی کھانے کو کچھ نہیں
آیا ہے وہ مقام چلو شاعری کریں
کاغذ بھی ہے قلم بھی ہے حقہ چلم بھی ہے
پورا ہے انتظام چلو شاعری کریں
مسرور شاہجہانپوری
No comments:
Post a Comment