فسانہ غم کا رسوائے جہاں ہوتا تو کیا ہوتا

 فسانہ غم کا رُسوائے جہاں ہوتا تو کیا ہوتا

محبت میں ہر اک آنسو زباں ہوتا تو کیا ہوتا

ارے او میرے ہونٹوں کا تبسّم دیکھنے والے

تجھے اندازۂ ضبطِ فُغاں ہوتا تو کیا ہوتا

زہے قسمت کہ اب بھی فرقِ حُسن و عشق باقی ہے

یہاں جو حال ہے دل کا وہاں ہوتا تو کیا ہوتا

کمالِ بندگئ عشق کی توہین سی ہوتی

جبیں پر میری سجدوں کا نشاں ہوتا تو کیا ہوتا

وفا اور پیار کی جب کوئی منزل ہی نہیں ہوتی

تو آخر شریکِ کارواں ہوتا تو کیا ہوتا

گُلوں کا ساتھ بھی چھُوٹا، چمن سے ربط بھی ٹُوٹا

بہاروں کی جگہ دورِ خزاں ہوتا تو کیا ہوتا

خموشی بن گئی ہے داستاں در داستاں جس کی

وہ عظمت سا اگر جادو بیاں ہوتا تو کیا ہوتا

عظمت النساء

عظمت عبدالقیوم