بیچ دلوں میں اترا تو ہے

 بیچ دلوں میں اترا تو ہے

درد تِرا البیلا تو ہے

رُوپ تِرا اے راجکماری

جیسے میری رچنا تو ہے

چاند کو تم آواز تو دے لو

ایک مسافر تنہا تو ہے

سُرجن ہارا، سُرجن ہارا

تجھ بِن بالک بلکا تو ہے

سر عالم کچھ کچھ ہم نے

سوچا تو ہے جانا تو ہے

کتنی صبحیں برہم ہوں گی

شعلہ امشب بھڑکا تو ہے

کہنے والے کہتا جا تو

نزد و دُور یہ چرچا تو ہے

مرگ کو یوں بے نام نہ سمجھو

ایک تخیل اُجلا تو ہے

صبحِ عشق اکیلی کب ہے

شامِ غم کا پہرا تو ہے

خواب سہی گر نقش عالم

انساں آتا جاتا تو ہے

کھوج میں اس کی برسوں پھر کے

چاند نگر پہچانا تو ہے

رستے بستے باغ میں یارو

مرگ کا ہر دم کھٹکا تو ہے

تیرا عظیم اے جانِ عالم

میر کی لے میں گاتا تو ہے

عظیم قریشی

٭سُرجن ہار: خالقِ کائنات، پروردگار، کرتار، پیدا کرنے والا