مری زندگی پہ نہ مسکرا مجھے زندگی کا الم نہیں​

مِری زندگی پہ نہ مسکرا، مجھے زندگی کا الم نہیں​
جسے تیرے غم سے ہو واسطہ وہ خزاں بہار سے کم نہیں​
وہی آبلے ہیں وہی جلن, کوئی سوزِ دل میں کمی نہیں

جو لگا کے آگ گئے تھے تم وہ لگی ہوئی ہے بجھی نہیں
مِرا کفر حاصلِ زہد ہے، مِرا زہد حاصلِ کفر ہے​
مِری بندگی ہے وہ بندگی جو رہینِ دیر و حرم نہیں​
مجھے راس آئیں خدا کرے یہی اشتباہ کی ساعتیں​
انہیں اعتبارِ وفا تو ہے، مجھے اعتبارِ ستم نہیں​

تِری یاد ایسی ہے باوفا پسِ مرگ بھی نہ ہوئی جدا

تِری یاد میں ہم مٹ گئے تِری یاد دل سے مٹی نہیں

وہی کارواں، وہی راستے، وہی زندگی وہی مرحلے

مگر اپنے اپنے مقام پر کبھی ہم نہیں کبھی تم نہیں
نہ وہ شانِ جبرِ شباب ہے، نہ وہ رنگ قہرِ عذاب ہے​
دلِ بے قرار پہ ان دنوں، ہے ستم یہی کہ ستم نہیں​

نہ فنا میری نہ بقا مِری مجھے اے شکیلؔ نہ ڈھونڈیے

میں کسی کا حسن خیال ہوں مِرا کوئی وجود و عدم نہیں

شکیل بدایونی