اور ہے اپنی کہانی اور ہے​

اور ہے، اپنی کہانی اور ہے​

داستاں اس کو سنانی اور ہے​

میں تو سویا تھا ستارے اوڑھ کر​

یہ رِدائے آسمانی اور ہے​

ریگِ صحرا میں سفینہ کیا چلاؤں​

اس سمندر کا تو پانی اور ہے​

پھول بھی لیتا چلوں کچھ اپنے ساتھ​

اس کی اِک عادت پرانی اور ہے​

اجنبی! اک پیڑ بھی ہے سامنے​

اس کے گھر کی اِک نشانی اور ہے​

یوں دبائے جا رہا ہوں خواہشیں​

جیسے اِک عہدِ جوانی اور ہے​

پار جانے کا ارادہ تھا عدیم​

آج دریا کی روانی اور ہے​

​

عدیم ہاشمی