عشوؤں کی ہے نہ اس نگہ فتنہ زا کی ہے

عشوؤں کی ہے، نہ اس نگہِ فتنہ زا کی ہے

ساری خطا مِرے دلِ شورش ادا کی ہے​

مستانہ کر رہا ہوں رہِ عاشقی کو طے​

کچھ ابتدا کی ہے، نہ خبر انتہا کی ہے​

کھِلتے ہی پھول باغ میں پَژمردہ ہو چلے​

جنبِش رگِ بہار میں موجِ فنا کی ہے​

ہم خستگانِ راہ کو راحت کہاں نصیب 

آواز کان میں ابھی بانگِ درا کی ہے​

ڈوبا ہوا سکوت میں ہے جوشِ آرزو ​

اب تو یہی زبان مِرے مدعا کی ہے​

لطفِ نہانِ یار کا مشکل ہے امتیاز​

رنگت چڑھی ہوئی ستمِ برملا کی ہے​

اصغر گونڈوی