یہ داغ مستقل ہے

 میں زیادہ دُکھی نہیں ہوں

میں نے دیکھا

نم کی کمی

اور جوان ہونے کی بے چینی میں مبتلا

ننھے پودے کا غم

جو مجھ سے زیادہ دکھی تھا

ایک غم نے میری بساط پہ جگہ بنا لی

میں نے دیکھے

غیر یقینی کے پرندے ہمہ وقت

تمہارے کاندھوں پہ بیٹھے ہوئے

تمہارے چہرے پہ

پھڑپھڑاتے ہوئے گمان کو

اور یقین کو پچھلے دروازے سے

باہر جھانکتے ہوئے

میں سہم گیا یہ دیکھ کر

ایک غم سرکتے ہوئے

میرے قریب آ گیا

میں نے تمہارے آنسوؤں کے ذائقے کو یاد کیا

برف پہ بکھرے نمک پہ

ننگے پاؤں چلتے ہوئے

تو میرا دکھ فٹ پاتھ کی برف پہ

دراز ہو گیا

میں اس مرتبہ

زیادہ دکھی ہونے سے بچ گیا

میں دکھی ہو گیا

اس پھول کو دیکھ کر

جو باغ کے آخری کونے میں کھلا

اور جس پہ کسی کا دھیان ہی نہیں گیا

آخر آج صبح احتجاجاً اس نے

اپنی پتیاں گرا دیں

مگر میں زیادہ دکھی نہیں ہوا

قلم پکڑنے والے ہاتھوں میں

لرزش دیکھ کر

سوائے اس وقت کے

جب میرے قرطاسِ دل پہ

یقین کی انمِٹ سرخی سےلکھ دیا گیا

“یہ داغ مستقل ہے”

اور فائل ہمیشہ کے لیے بند کر دی گئی

ثاقب ندیم