ہر نفس میں تھا جنوں موجۂ خوشبو باندھے
میں نے بھی وجد میں کھولے کبھی گیسو باندھے
میرے حرفوں پہ سدا رہتا ہے وارث کا فسوں
اک عجب سحر میں ہر پل مجھے باہو باندھے
آنکھ پر رکھا گیا ہے تیرے جلووں کا حصار
ہے کوئی تارِ تحیر مجھے ہر سو باندھے
دام پھیلائے فسوں کاریِ گفتار نہ کیوں
چشمِ ساحر کا تِری کیسے نہ جادو باندھے
عمر بھر اس سے رہائی کی تمنا نہ کروں
آ کے پیمانِ وفا میں جو مجھے تُو باندھے
مشکِ نافہ میں تھی زنجیر ڈھلی لفظوں کی
جب تخیل کے بھٹکتے ہوئے آہُو باندھے
مجھ کو یاد آئی وہی رسمِ رسن ظالم نے
پا بہ زنجیر کیا جب مِرے بازو باندھے
سانحہ کوئی رُلاتا ہی نہیں کیوں مجھ کو؟
چشم، کِن تشنہ لباں سے سبھی آنسو باندھے؟
اپنا معیارِ محبت ہے فقیری نسرین
کاسہ ہاتھوں میں لیا پاؤں میں گھنگھرو باندھے
نسرین سید
No comments:
Post a Comment