خدا کرے کہ نیا سال لائے ایسی سحر

 ایک دعا نئے سال کے لیے

خدا کرے کہ نیا سال لائے ایسی سحر

کہ جس کی کرنوں سے روشن ضمیرِ آدم ہو

چلے چمن میں مرے اب کی بار ایسی ہوا

بکھرتے ٹوٹتے رشتوں میں ربطِ باہم ہو

خزاں رسیدہ بدن مثل گل کھلیں پھر سے

مٹا کے شکوے گلے یار بھی ملیں پھر سے

مرے وطن میں کوئی دل بھی سوگوار نہ ہو

لبوں پہ نالے نہ ہوں، آنکھ اشکبار نہ ہو

ہجوم یاس سے بے تاب کوئی فرد نہ ہو

کہ دور جادۂ منزل سے رہ نورد نہ ہو

نہ خوں بہے کسی مظلوم کا وطن میں مرے

پیامِ امن کی خوشبو ہو اب سخن میں مرے

نگار خانۂ گلشن میں کوئی خار نہ ہو

خزاں کے خوف میں لپٹی کوئی بہار نہ ہو

وفا، خلوص و مروت سے قلب ہوں معمور

نہ بھوک سے کوئی تڑپے نہ کوئی ہو مجبور

یہ سالِ نو، سحرِ نو کی سلسبیل بنے

ہر ایک عاجز و نادار خود کفیل بنے

ہمارے بچوں کے ہاتھوں میں ہو کتاب و قلم

جواں بڑھیں سوئے منزل لیے وفا کے علم

پھر اب کی بار نہ دیکھیں ملال کا موسم

ملا دے اپنوں سے ہم کو وصال کا موسم

یہ سالِ نو ہو مبارک دعا ہے اہلِ جہاں

سکون و امن کا پیکر ہو عالمِ امکاں

ضیائے فکر کا اب کے چلن نرالا ہو

فروغِ علم سے منصور پھر اجالا ہو

منصور نقوی