حکایت غم ہستی کوئی سنے تو کہوں

 حکایتِ غمِ ہستی کوئی سنے تو کہوں

بھرے جہاں میں کوئی ہمنفس ملے تو کہوں

شبِ فراق کی ظلمت میں دل پہ کیا گزری

کوئی چراغ اگر بزم میں جلے تو کہوں

نہ پوچھ دل پہ جو گزری شکستِ جام کے بعد

ذرا سی گردشِ دوراں اگر رُکے تو کہوں

ہے کس کے بزمِ تمنا میں جلوہ آرائی

تمہارے بعد نظر میں کوئی جچے تو کہوں

بتاؤں کیا کہ جو گزری ہے دشتِ غربت میں

جو میرے ساتھ کوئی دو قدم چلے تو کہوں

کہاں پہ آئے ہیں، منزل کہاں پہ کھوئی ہے

کوئی بچھڑ کے، سرِ رہگزر ملے تو کہوں

مِرے فسانے کو تاریخ کا ورق سمجھو

جگر کو تھام کے کوئی اگر لکھے تو کہوں

چمن میں، کیا تھا نسیمِ بہار کا عالم

تمہارے باغ میں کوئی کلی کِھلے تو کہوں

وحیدہ نسیم