لگائی آگ خود ہم نے زمانے سے گلہ کیا ہے

 لگائی آگ خود ہم نے زمانے سے گِلہ کیا ہے

چمن جل کر ہوا ہے راکھ باقی اب رہا کیا ہے

ملی پل بھر خوشی ہمدم یہ سنتے ہی جلا کیا ہے

کبھی میری تباہی پر پریشاں بھی ہواکیا ہے

وفا میں چوٹ کھانا بھی غنیمت جان لیتے ہیں

کریں لاکھوں ستم کوئی اگر ہم پر بُرا کیا ہے

سحر تک جا بہ جا برسات شبنم کی ہوئی لیکن

فقط میری گلی میں سنگ یا شعلہ گرا کیا ہے

کنارے سے اُتر کر ہی سمندر پار ہوتا ہے

تماشا دیکھنے والے مقدر سے گلہ کیا ہے

ذرا سی موج بھی کشتی سمندر میں بہا لے گی

دلاسہ تم اگر دو گے نہیں تو آسرا کیا ہے

طرف داری نہیں کرتا کبھی عارف سیاہی کی

مجھے سُولی چڑھا دیں گے اگر منصف روا کیا ہے

جاوید عارف