سرہانے بے بسی روتی رہی ہے
شبِ غم زندگی روتی رہی ہے
شبِ غم سانحہ کیا ہو گیا تھا
بہر سُو چاندنی روتی رہی ہے
مِری بے چارگی پر بزمِ انجم
کبھی ہنستی کبھی روتی رہی ہے
گلوں کی مسکراہٹ یاد کر کے
گلستاں میں کلی روتی رہی ہے
خلش ہوتی ہے پتھر کے بھی دل میں
بتوں کی آنکھ بھی روتی رہی ہے
تمہیں کیا ہے خبر تنہائیوں میں
ستمگر کی گلی روتی رہی ہے
فقط آنکھیں نہیں فرقت کی شب میں
ہماری روح بھی روتی رہی ہے
ظفر جب سے ہوا ترکِ تعلق
ہماری شاعری روتی رہی ہے
ظفر انصاری
No comments:
Post a Comment