پتھر کا آسمان مرے سر پہ آ گرا

 پتھر کا آسمان مِرے سر پہ آ گرا

حسبِ وفا لگان مرے سر پہ آ گرا

میں مرغزارِ طِفلی سے نکلا ہی تھا تبھی

اس عمر کا مکان مرے سر پہ آ گرا

اس خود پرست بُت نے جو سجدہ کیا مجھے

تو اُس کا بارِ شان مرے سر پہ آ گرا

آیا ہی تھا خیال کہ؛ یہ وصل ہے بھرم

نوزائیدہ گمان مرے سر پہ آ گرا

آئینہ خانہ تھا جو مری خود شناسی کا

شیشہ کا وہ مکان مرے سر پہ آ گرا

اندازے اور گمان تو دنیا کے ہو گئے

سچائی کا بیان مرے سر پہ آ گرا

جب دشتِ بے خودی میں ملا سایۂ فہم

کاشف وہ سائبان مرے سر پہ آ گرا

سید کاشف