زمانے بھر نے ستم ہم پہ ڈھائے ہیں کیا کیا
جنونِ ضبط میں صدمے چھپائے ہیں کیا کیا
بدل کہ کروٹیں ہر پل تجھے ہی یاد کیا
شبِ فراق میں ہم تلملائے ہیں کیا کیا
تلاش زیست میں ہم نے گنوا دیا خود کو
دیارِ غیر میں آنسو بہائے ہیں کیا کیا
تجھے خبر ہی نہیں ہے کہ روشنی کے لیے
چراغ خونِ جگر سے جلائے ہیں کیا کیا
تمہارے دم سے تھا آباد میرا دل جاناں
تمہارے جانے سے طوفان آئے ہیں کیا کیا
یہ جان و دل تِری خاطر لٹا دئیے ہم نے
تقاضے اپنی وفا کے نبھائے ہیں کیا کیا
جہان چھان لیا کچھ خبر نہیں اس کی
نشان تُو نے زمانے مٹائے ہیں کیا کیا
تمہارے سانچے میں خود کو جو ڈھالنے کو کہا
تو کوزہ گر نے بہانے بنائے ہیں کیا کیا
فہیم ٹوٹ کے بکھرا میں خاک میں جس دم
ہوا نے خاک کے ذرے اڑائے ہیں کیا کیا
محمد فہیم
No comments:
Post a Comment